Normas de comportamento na Internet
Claves para interactuar de xeito correcto na Rede. A Netiqueta.
Internet, como canle de comunicación que é, está suxeito a unha serie de
regras e normas de corrección que nos permiten o intercambio de ideas e
información có resto de usuarios. Neste apartado aprenderemos cales son
os criterios máis importantes e os comportamentos que debemos evitar na
nosa interacción pola Rede.
1. A Rede como canle de comunicación
Unha canle de comunicación é, basicamente, a ferramenta empregada para trasladar unha mensaxe dun emisor a un receptor. A canle non é a mensaxe en si, mais determina a estrutura que debe seguir a mesma.
A Internet é, a diferenza de outras como a televisión ou a prensa escrita, unha canle de comunicación bidireccional, de xeito que a mensaxe do emisor pode ter resposta por parte de outras persoas. Xa que logo, a referida bidireccionalidade obriga a contar nas mensaxes que se emitan cunhas normas para a boa educación e o respecto aos interlocutores. Esas regras de comportamento na Internet coñécense como “Netiquette” ou “Netiqueta”.
Inicio
2. Regras básicas da Netiqueta
Na Internet, ademais das regras de comportamento que se usan na vida real, contamos cunha serie de normas específicas que nos facilitan a comunicación e garanten o respecto entre as partes.
Aínda que trataremos polo miúdo as diferentes normas segundo a
ferramenta a empregar, subliñaremos agora os principais factores a ter en
conta:
- Uso correcto de maiúsculas. Na Rede, ao carecer de comunicación non verbal, o uso de escritura en maiúsculas interprétase coma un berro, de xeito que debemos evitar a publicación de textos con esa característica e procuraremos utilizar estas de forma correcta e cando correspondan.
- Linguaxe SMS. Internet non é un móbil e non implica unha restrición de carácteres nas nosas mensaxes, polo que evitaremos o uso da linguaxe SMS sempre.
- Corrección ortográfica. As nosas mensaxes deben ser claras e estar correctamente escritas para garantir a súa lexibilidade por parte dos receptores. Agás erro, debemos procurar unha boa redacción e unha correcta ortografía nos nosos escritos. Ademais, debemos absternos de utilizar cores e fontes tipográficas que poidan dificultar a lectura.
- Respecto polos interlocutores. Aínda que ás veces se nos poida esquecer, ao outro lado temos persoas coma nós que nos len, polo que hai que tratalas como tales, brindándolles respecto e poñéndonos no seu lugar para tratar de entender as súas opinións.
- Adecuación ao contexto. A Internet é moi grande e nela podemos atopar multitude de temas e opinións. Debemos coñecer e adaptarnos aos temas que se tratan nunha comunicación determinada antes de publicar a nosa opinión, de xeito que esta sexa acorde aos asuntos que se estean a tratar e non rompan co diálogo. Non é de boa educación que se os usuarios están a falar dun tema concreto nós publiquemos a nosa opinión sobre outro que nada ten que ver.
3. A Netiqueta no correo electrónico
As mensaxes de correo electrónico teñen unhas regras de etiqueta propias que debemos ter en conta ao utilizar esta ferramenta. As principais norma de comportamento na comunicación por e-mail son:
- Mensaxes procedentes.
Parece obvio, maisrouban tempo non
está de máis recordar que debemos evitar remitir correos electrónicos a
quen non nolos solicita. Feito de xeito masivo e con contido
publicitario, o envío de correo non desexado coñécese polo termo inglés
de SPAM
- Arquivos adxuntos. Igual que no punto anterior, debemos evitar o envío de arquivos adxuntos que non se nos teñan solicitado, xa que saturan os buzóns de correo, ralentizan a descarga do mesmo e, o máis importante, rouban tempo á persoa a quen llos remitimos.
- Correos masivos.Na liña dos anteriores, debemos evitar o envío de correos circulares. No caso de precisar o envío dunha comunicación a unha lista de correo, procuraremos que as direccións vaian no apartado de Copia Oculta (CCO) e poñer no Para a nosa propia dirección. Pode haber xente que queira que nós teñamos a súa dirección mais non que a teñan outras persoas.
- Información sensible. A excepción de que se use algún tipo de encriptación, hai que asumir que os correos non son seguros, de xeito que debemos evitar incluír información sensible neles (deberiamos pensar no correo electrónico como nunha postal, na que todo está á vista).
- Confirmación de correo. Se non é totalmente imprescindible, non solicites confirmación de correo nos e-mail que remitas. Estas obrigando ao receptor a dar unha resposta que ao mellor non quere, polo que se considera de moi mala educación.
4. A Netiqueta na mensaxería instantánea e o
chat.
Os chats e a mensaxería instantánea son ferramentas de contacto directo en tempo real, polo que teñen unha serie de normas propias que debemos ter en conta.
- Permiso do interlocutor. Non agreges a ninguén á túa lista de usuarios sen contar co seu permiso para facelo. Asemade, nos chats debes respectar a vontade dun usuario que non queira falar contigo por vía privada.
- Uso de maiúsculas. Esta regra básica da Netiqueta é especialmente importante na comunicación por chat ou mensaxería, xa que o uso de capitalización nas mensaxes interprétase como berros, e pode derivar en discusións non desexadas ou producir malestar nos interlocutores.
- Respecto de turnos. Non debes esquecer que te estás a comunicar, de xeito que a persoa ou persoas coas que falas tamén teñen dereito a respostar. Non satures as liñas de mensaxe, agarda as respostas (non todo o mundo tarda o mesmo tempo en contestar) e, no caso do chat, respecta as conversas que se estean a producir antes da túa chegada.
- Estado de conexión. Se non vas poder respostar mensaxes ou non vas estar diante do ordenador, indícallo aos teus interlocutores mediante o status do axente de mensaxería, de xeito que estes poidan saber se estás ou non dispoñible.
- Privacidade. Lembra sempre que tanto nun chat como, sobre todo, por mensaxería instantánea, un nick activo non implica necesariamente que ao outro lado haxa unha persoa concreta. Unha conta aberta só indica que un ordenador está aceso, mais diante del pode non estar quen ti esperas.
- Don’t feed the Troll. Hai unha regra básica tanto en comunicación en tempo real como na Internet en xeral: non alimentar os Trolls. É dicir, que aqueles usuarios que se limitan a incorporar ruído nas conversas ou a tratar de crear malestar nos usuarios deben ser ignorados, xa que calquera outro comportamento para con eles dalles pulos para continuar molestando. Un Troll non razoa, non se suxeita a regras e non atende a razóns, polo que debe ser expulsado mediante a táctica de ignoralo.
5. A Netiqueta nas Redes Sociais
Ademais das regras anteriores, que se poden aplicar en distintas canles, as Redes Sociais contan cunhas particularidades que nos obrigan a ter en conta unhas normas específicas.
- Púbico vs. Privado. Unha información que só lle interesa a un dos contactos da nosa Rede conta cun mecanismo específico para ser transmitido: a mensaxe privada. Publicar información privada no muro dun dos nosos contactos non está ben visto e, ademais, pode chegar a perxudicalo, polo que o evitaremos na medida do posible.
- Fotografías. Debemos ter coidado á hora de publicar imaxes nas que aparezan terceiros e procurar ter permiso para facelo. Ademais, non debemos etiquetar a ningún contacto nas fotos que publiquemos sen o seu consentimento expreso. Por outra banda, etiquetar nunha foto a persoas que non aparecen nela está mal visto e considérase SPAM, polo que debemos evitalo.
- Invitacións a eventos. Se xestionamos un evento local, debemos ter en conta que moitos dos contactos da nosa Rede poden residir nunha cidade distinta, polo que é probable que non vaian acudir. Na medida do posible, debemos evitar invitar a persoas que sabemos que non asistirán.
- Aplicacións e xogos. Moitas Redes Sociais contan con aplicacións de ocio e xogos que amenizan aos usuarios. Sen embargo, non todos os nosos contactos serán afeccionados a elas, polo que debemos evitar o envío de invitacións ás mesmas a quen sabemos que non lle interesará.
- Respecto ao Muro alleo. As nosas aplicacións, publicacións ou actualizacións deben realizarse sempre no noso Muro. O Muro dos nosos contactos é deles, polo que salvo mensaxes e comentarios, debemos absternos de publicar contidos propios nos mesmos.
- SPAM social. Debemos evitar o envío masivo, a través das Redes Sociais, de invitacións de amizade a persoas que non coñecemos. O coleccionismo de amigos non está ben visto e, ademais, non nos aporta ningún beneficio a longo prazo. Se estamos a buscar novos amigos, na invitación de amizade debemos incluír un breve correo explicándoo, de xeito que a outra persoa poida valorar a nosa solicitude.
6. Resumo
A Internet, como ferramenta de interacción entre persoas, require dunha serie de regras de comportamento que garantan a comunicación e o respecto dos usuarios.
Dita ferramenta, xa que logo, precisa do coñecemento das súas normas de funcionamento. Ese coñecemento repercute nunha correcta integración no medio e nunha mellor aceptación por parte dos nosos interlocutores.
Empregar e difundir as regras de etiqueta na Internet permítenos optimizar o resultado do que buscamos ao mergullarnos na Rede, obter unha interacción con outras persoas e compartir o noso coñecemento e pensamento.
Inicio